65. ตนฺนิสฺสิเต ลฺโล

ลฺลปจฺจโย โหติ ทุติยนฺตา ตนฺนิสฺสิตตฺเถฯ เวทํ นิสฺสิตํ เวทลฺลํฯ ทุฏฺฐุ นิสฺสิตํ ทุฏฺฐุลฺลํฯ เวทนฺติ ตุฏฺฐิฯ อิลฺเล สงฺขารํ นิสฺสิตํ สงฺขาริลฺลํฯ

66. ตสฺส วิการาวยเวสุ ณ+ณิก+เณยฺย+มยา

ปกติยา อุตฺตร+มวตฺถนฺตรํ วิกาโรฯ ฉฏฺฐิยนฺตา นามสฺมา วิกาเร+วยเว จ ณาทโย โหนฺติ พหุลํฯ ณ-อยโส วิกาโร อายสํ พนฺธนํ, สกาคโมฯ อุทุมฺพรสฺส อวยโว วิกาโร วา โอทุมฺพรํ ภสฺมํ ปณฺณํ วาฯ กาโปตํ มํสํ สตฺติ วาฯ ณิก-กปฺปาสสฺส วิกาโร กปฺปาสิกํ วตฺถํฯ เณยฺย-เอณิสฺส วิกาโร+วยโว วา เอเณยฺยํฯ โกสานํ วิกาโร โกเสยฺยํ วตฺถํฯ มย-ติณานํ วิกาโร ติณมยํ, ทารุมยํ, นฬมยํ, มตฺติกามยํ, สุวณฺณมโย รโถ, รูปิยมยํฯ ‘‘อญฺญสฺมิํ’’ติ มโย, คุนฺนํ กรีสํ โคมยํฯ

67. ชตุโต สฺสณ วา

วิการาวยเวสุ ชตุโต สฺสณ วา โหติฯ เอตฺถ ‘‘วิการาวยเวสู’’ติ วตฺตนฺเตสุปิ พหุลาธิการา วิกาเรเยว โหติฯ ชตุโน วิกาโร ชาตุสฺสํ ชตุมยํฯ